القصة ومافيها أنك بتكوني فايقة الصبح وطالعة من البيت وأنتِ مبسوطة أو نص مبسوطة أو مو مبسوطة منوب منوب .. ماشية بنور الله وعم تقولي أصبحنا واصبح الملك لله ..

وما بتلائي غير حدا نط لنص وشك بملامحو المرتاحة ووشو البشوش وزت بأدنك هديك الجملة القنبلة وهو مرووووء … ممكن نتعرف؟!!!!!!!

طبعا أنتي بهالموقف ممكن تزوريه وتزتيلو شي كلمة تزعجه فيها ، بس بعد شو؟ … بعدما يكون نزعلك صباحك يلي بيجوز بيجوز هه مايكون انتزع لسى من شي تاني ..

بتحملي حالك وبتطلعي ع الباص أو الميكرو عم تفكري بقديش عندك شغل أو دراسة أو بأي شي تاني زاعجك .. ممكن يكون ممكن نتعرف نبر ون …ومابتلائي غير يلي قدامك هيك شنك وزتلك هديك الكلمة ذات الرنين المغناطيسي مو الجاذب أبدا لأ المنفر كتير : ممكن نتعرف؟!…

هون بئى ممكن يطلع من راسك دخنة أو ريحة شويط … بتعقدي الحاجبين نص شبر وبتطلبي من شوفير الميكرو ينزلك على اليمين أحسن ماتحلفي يمين أنو ماعاد تركبي مكاري ..

وبطبطلي تروحي بتلفي وبترجعي ع بيتك …وبما أنك معصبة من كل هالممكنات نتعرف بتفتحي التلفزيون على شي غنية على أمل تروقي شوي..وأنت عم تتفرجي وبلشت هه تنسي عينك بالغلط بتضرب على شريط المسجات يلي بسفل الشاشة وبتنفلجي بالجملة ذاتها مع شوية بهارات مشان السوسبينس : أنا شب أموووووررر ومهضوووم عاوز اتعرف على بنوتة دلوعة … لك ساعتها بتسبي حالك وبقولي تضربي انت والساعة يلي حبيتي فيها تفتحي التلفزيون …

بتهدي حالك وبتعطي حالك تفاؤل بأنك إذا فتحتي الراديو مارح تلاقي شريط مسجات تتفركشي فيه بممكن نتعرف …
بدور بهالمحطات ومن موجة لموجة لتلاقي شي غنية تنبسطي عليها … وفجأة وبدون سايق إنذار وبنص الغنية بتنط المذيعة الدلوعة وبتزتلك الجملة الشهيرة : مومو بعت Sms وحابب يتعرف !!!!!!!!!!!!!!!

هون بئى وعند هالكلمة بالذات رح تمسكي الراديو وبتنطي فوقه عشر نطات وبتشوطيه عشر شوطات وبعدين بطلعي بتزتيه من ع البرندة … وبتعدي تضحكي وتبكي ع حالك ..

بس انتبهي انو مايكون في حدا قدامك لانو إذا أهلك شافوكي بهالحالة رح يتصلوا بسرعة بمستشفى المجانين وياخدوكي لهونيك …